ईपीएलमा पोखराको पहिलो जित

असोज १३ । एभरेष्ट प्रिमियर लिग (ईपीएल) टी-ट्वान्टी क्रिकेटमा पोखरा राइनोजले पहिलो जित निकालेको छ।

त्रिवि क्रिकेट मैदानमा ७ ओभरमा छोट्याइएको खेलमा बुधबार साविक विजेता ललितपुर प्याट्रीयट्सलाई पोखराले ९ विकेटले हराएको हो। ललितपुरले दिएको ५२ रनको लक्ष्य पोखराले ६ ओभर ३ बलमा १ विकेट गुमाएर पूरा गर्‍यो। पोखराको जितमा रिचार्ड लेभीले अविजित ३८ रन बनाए। यस्तै रित गौतमले १२ रन बनाउँदा साहन अराचिगे १ रनमा अविजित रहे।

यसअघि टस हारेर पहिले ब्याटिङ गरेको ललितपुरले निर्धारित ७ ओभरमा ६ विकेट गुमाएर ५१ रन बनाएको थियो। ललितपुरका लागि सन्दुन वीराक्कोडीले सर्वाधिक १९ रन बनाए। ओशाडा फर्नान्डोले अविजित १० रन जोडेका थिए।

जितसँगै पोखरा तालिकाको शीर्ष स्थानमा उक्लिएको छ। पोखराले २ खेलमा ३ अंक जोडेको छ।