फागुन १४ । रुस र युक्रेनबीच युद्ध सुरु भएको तेस्रो दिन आज राजधानी किभमा लडाईँ भइरहेको अन्तर्राष्ट्रिय सञ्चारमाध्यमहरूले जनाएका छन्।
बिहीबारदेखि सुरु भएको युद्धमा हालसम्म १९८ युक्रेनीको मृत्यु भएको छ। जसमा ३ बालबालिकासमेत छन्।
युद्धका क्रममा १ हजार ११५ जना घाइते भएका छन्। जसमा ३३ बालबालिका रहेको युक्रेनी स्वास्थ्य मन्त्रालयले जनाएको छ। युद्ध चर्किएपछि युक्रेनका राष्ट्रपति भ्लोडिमिर जेलेन्स्कीले आफ्ना नागरिकलाई सहयोगका लागि आह्वान गरेका छन्।
जेलेन्स्कीले आत्मसमर्पण नगर्ने र आफ्नो देशको रक्षाका लागि लडाईँ जारी राख्ने स्पष्ट पारेका छन्।
रुसी सेनाले भने युक्रेनी सहर मेलिटोपोललाई नियन्त्रणमा लिएको र युक्रेनका सैन्य पूर्वाधारलाई हावा र समुद्रमा आधारित क्रुज मिसाइलले निशाना बनाएको बताएको छ।
यता, अमेरिकाले रुसी राष्ट्रपति भ्लादिमिर पुटिन र विदेशमन्त्री सर्गेई लाभरोभलाई प्रतिबन्ध लगाउने बताएको छ। संयुक्त राष्ट्रसंघका अनुसार युद्ध सुरु भएदेखि ५० हजारभन्दा बढी युक्रेनी नागरिक अन्य देशमा पलायन भएको जनाएको छ।
युरोपले दशकयताकै सबैभन्दा ठूलो सुरक्षा संकटको सामना गरिरहेको राष्ट्र संघले टिप्पणी गरेको छ।
