काठमाडौं, पुस १० । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले सात दशक लामो संघर्षबाट प्राप्त उपलब्धी रक्षा गर्ने दायित्व हाम्रो काँधमा आएको बताएका छन्। नेकपाको प्रचण्ड–नेपाल समूहले बबरमहलमा आयोजना गरेको पत्रकार सम्मेलनमा प्रचण्डले प्रधानमन्त्री केपी शर्मा ओलीले हुँदै नभएको अधिकार प्रयोग गरेर संसद विघटन गरेको आरोप लगाए।
उनले संविधानविद्, कानुन व्यवसायी तथा नागरिक समाज र राजनीतिक दलले संसद विघटनको अधिकार प्रधानमन्त्रीलाई नरहेको बताइरहँदा प्रधानमन्त्रीले त्यो आवाज नसुनेको बताए। प्रधानमन्त्रीले लोकतन्त्रमाथि नै प्रहार गरी ल्याएको प्रस्तावलाई स्वीकृत गरेर राष्ट्रपति विद्यादेवी भण्डारीले पनि लोकतन्त्रमाथि प्रहार गरेको आरोप लगाए। प्राप्त उपलब्धी रक्षाका लागि आफूहरु अघि बढेको बताउँदै उनले प्राप्त उपलब्धीको रक्षा गर्दै नयाँ उपलब्धी हासिल गर्दै लैजाने बताए।


























