काठमाडौं, पुस ८ । कोरोना कहरकै बीच नेपाल भित्रने विप्रेषण (रेमिट्यान्स) बढ्न थालेको छ। विश्व महामारीसँग जुँधिरहेको र विदेशमा रहेका धेरै नेपालीले रोजगारी गुमाएपनि रेमिट्यान्स भने बढेको देखिएको छ।
नेपालमा मासिक औसतमा ७३ अर्ब रुपैयाँको हाराहारीमा रेमिट्यान्स भित्रिने गर्छ। तर, कात्तिक महिनामा औसतभन्दा बढी अर्थात् ७८ अर्ब ८६ करोड रेमिट्यान्स भित्रिएको छ। नेपाल राष्ट्र बैंकको कात्तिकसम्मको देशको वर्तमान आर्थिक तथा वित्तीय स्थिति विषयक प्रतिवेदनले यस्तो देखाएको हो। समग्रमा कात्तिकसम्म रेमिट्यान्स आप्रवाह ११ दशमलव २ प्रतिशते बढेको छ।
समीक्षा अवधिमा ३ खर्ब ३७ अर्ब ७२ करोड रेमिट्यान्स नेपाल भित्रिएको छ। गत आवको सोही अवधिमा भने ३ खर्ब ४ अर्ब ९७ करोड रेमिट्यान्स भित्रिएको थियो। राष्ट्र बैंकका अनुसार गत आवको सो अवधिमा रेमिट्यान्स आप्रवाह २ दशमलव ८ प्रतिशतले घटेको थियो।
कोरोना महामारीका कारण रेमिट्यान्स आप्रवाहमा कमी आउने आकलन गरिए पनि नेपालमा गत जेठदेखि नै औसतभन्दा माथि अर्थात् ७३ अर्बभन्दा बढी रेमिट्यान्स आप्रवाह भएको छ। तर, भदौमा भने औसत बराबर ७३ अर्ब रेमिट्यान्स भित्रिएको थियो।२०२० मा नेपाल आउने रेमिट्यान्स विश्व बैंकले १४ प्रतिशत एशियाली विकास बैंक (एडीबी) ले २८ दशमलव ७ प्रतिशतले घट्ने प्रक्षेपण गरेका थिए।


























