काठमाण्डौं,माघ २३ । प्रमुख प्रतपक्षी दल नेपाली कांग्रेस संसदीय दलले अख्तियार दुरुपयोग अनुसन्धान आयोग ‘ओली आयोग’बनेको आरोप लगाएको छ।
शुक्रवार विहान सिंहदरबारस्थित संसदीय दलको कार्यालयमा बसेको कांग्रेस संसदीय दलको बैठकले अख्तियार दुरुपयोग अनुसन्धान आयोग ‘ओली आयोग’मा रुपान्तरण भएको आरोप लगाएको हो।
संसदीय दलको बैठकले विजयकुमार गच्छदारमाथिको मुद्दा राजनीतिक पूर्वाग्रहपूर्ण भएको तत्कालिन शाही आयोगजस्तै अख्तियार पनि ‘ओली आयोग’ बनेको निश्कर्ष निकालेको कांग्रेसका एक सांसदले बताए।
बैठकमा संसदीय दलका नेता तथा पार्टी सभापति शेरबहादुर देउवा र उपनेता गच्छदारले सरकार र नेकपाले कोही व्यक्तिमाथि नभई कांग्रेस माथि नै आक्रमण गरेको बताएका थिए। उनीहरुले वर्तमान सरकार र नेकपा कांग्रेसलाई सिध्याउने खेलमा लागेको आरोप लगाएका थिए।
गच्छदारमथि मुद्दा दर्ता भएपछि बिहीबारको प्रतिनिधिसभा बैठक अवरुद्ध गरेको कांग्रेसले त्यसलाई निरन्तरता दिने निर्णय समेत संसदीय दलबाट गरेको छ।
बुधवार अख्तियार दुरुपयोग अनुसन्धान आयोगले नेपाली कांग्रेसका संसदीय दलका उपनेता विजयकुमार गच्छादारसहित १ सय ७५ जना विरुद्ध ललिता निवास जग्गा प्रकणमा मुद्दा दर्ता गरेपछि कांग्रेसले त्यसलाई राजनीतिक पूर्वाग्रहयुक्त भएको जनाएको छ।
नेपाली कांग्रेसले हिजो पत्रकार सम्मेलन गर्दै पूर्वाग्रह साधेर मुद्दा चलाइएको भन्दै त्यसको संसद र सडकबाट प्रतिवाद गर्ने जनाएको थियो।
