साउन ७ । टोकियो ओलम्पिकको पुरुष फूटबलमा मेक्सिको र न्युजिल्याण्डले विजयी सुरुवात गरेका छन्। स्पेन भने इजिप्टसँग गोल रहित बराबरीमा रोकिएको छ।
समुह ‘ए’ को खेलमा मेक्सिकोले फ्रान्सलाई ४–१ गोल अन्तरमा पराजित गर्यो। पहिलो हाफ गोलरहित बराबरीमा रोकेपनि दोस्रो हाफमा फ्रान्सले लय गुमाउन पुगेको थियो।
४७ औं मिनेटमा इमेस्तो भेगाले मेक्सिकोका लागि खाता खोलेका थिए। ५५ औं मिनेटमा फ्रान्सिस्को कोर्डोभा, ८० औं मिनेटमा कार्लोस आन्तुना र दोस्रो हाफको अतिरिक्त समयमा एदुआर्दो एग्युरेले मेक्सिकोका लागि गोल गरे। ६९ औं मिनेटमा एण्ड्री पिर्रे गिग्नाकले पेनाल्टी मार्फत फ्रान्सका लागि सान्त्वना गोल फर्काएका थिए।
समुह बी को खेलमा न्युजिल्याण्डले दक्षिण कोरियामाथि १–० गोलको साँधुरो जित निकाल्यो। न्युजिल्याडलाई पहिलो खेलमा नै ३ अंक दिलाउन ७२ औं मिनेटमा क्रिस उडले एकमात्र गोल गरे। ६३ प्रतिशत खेल आफ्नो नियन्त्रणमा राखेपनि दक्षिण कोरियाले गोल भने फर्काउन सकेन।
टोकियो ओलम्पिकको पुरुष फूटबल तर्फ उद्घाटन खेलमा स्पेन इजिप्टसँग बराबरीमा रोकिएको छ। समुह सी को पहिलो खेलमा इजिप्टले स्पेनलाई गोलरहित बराबरीमा रोकेको हो।
६२ प्रतिशत खेल आफ्नो नियन्त्रणमा राखेपनि स्पेन गोल गर्न भने असफल भएको थियो। स्पेनका करीब एक दर्जन प्रहारले पोष्टको दिशा लिन सकेन।
