लम्जुङ १९ माघ । गण्डकी प्रदेशअन्तर्गत पहाडी र हिमाली जिल्ला जोड्ने एक मात्र बेँसीशहर–चामे सकड तीन दिनका लागि बन्द हुने भएको छ। लमजुङ र मनाङ जोड्ने उक्त सडकको स्तरोन्नति गर्नका लागि मंगलबार बिहान १० बजेदेखि बिहीबार राति १० बजेसम्मका लागि पूर्णरुपमा बन्द गर्न लागेको हो। जिल्ला प्रशासन कार्यालय लम्जुङले सोमबार एक विज्ञप्ति जारी गर्दै सडक बन्द हुने जानकारी गराएको हो।
उक्त सडकखण्डअन्तर्गत लम्जुङको उत्तरी भेग मर्स्याङ्दी गाउँपालिका–४ स्यांगेनिरको सडकमा ढलान कार्य हुने र सो स्थानमा सडक निकै साँघुरो भएकाले सानाठूला सबै प्रकारको सवारीसाधन आवतजावतमा पूर्ण रोक लगाइएको सहायक प्रमुख जिल्ला अधिकारी काजीमान सुनारले जानकारी दिए। ‘डुम्रे–बेँसीशहर–चामे सडक योजना कार्यालयबाट प्रशासनलाई उक्त सडकमा सबै प्रकारका सवारी सञ्चालनमा रोक लगाएर निर्माण कार्य अगाडि बढाउन र सहज बनाउन अनुरोध गरेसँगै निर्माण कार्यलाई मध्यनजर गर्दै उक्त समय बन्द गर्न लागेका,’ उनले भने।
डुम्रे–बेँसीशहर–चामे सडक योजना कार्यालयका इन्जिनीयर तथा सूचना अधिकारी सुरज महर्जनका अनुसार स्यांगेनिरको १०० मिटर खण्डमा ढलान (पिसिसी) कार्य गर्न लागेको हो। नेपाली सेनाले भीर खोपेर निर्माण सम्पन्न गर्दै विसं २०६९ मा सडक डिभिजन कार्यालय दमौली तनहुँलाई हस्तान्तरण गरेको थियो। – रासस
