भरतपुरमा ६८.६७ प्रतिशत मत खस्यो, कहाँ कति खस्यो? (विवरण सहित)

चितवन बैशाख ३० । भरतपुरको मतगणना स्थलमा मतपेटिका आउने क्रम जारी रहेको छ। मतदान सकिए सँगै महानगरका २९ वटै वडाबाट कडा सुरक्षाका साथ चितवन उद्योग संघको प्रदर्शनी केन्द्रमा मतपेटिका आउने क्रम जारी रहेको हो। अहिलेसम्म ६५ मध्ये २६ स्थानबाट मतपेटिका आइपुगेका छन्। मतगणना स्थलमा कडा सुरक्षा व्यवस्था बनाइएको छ।

कहाँ कति खसे मत?

भरतपुर महानगर पालिकामा १ लाख ८५ हजार ७ सय ५१ मतदाता रहेका थिए। जसमध्ये जम्मा १ लाख २७ हजार ५ सय छैंसट्टी मत अर्थात् ६८.६७ प्रतिशत मत खसेको विवरण प्राप्त भएको छ। सबैभन्दा धेरै १३ हजार ८ सय ३८ मतदाता भएको वडा नं.११ मा ९ हजार ८१ मत खसेको छ भने सबैभन्दा कम ३ हजार १ सय ९१ मतदाता रहेको वडा नं. २४ मा २ हजार २ सय ८६ मत खसेको छ। अनुपातको आधारमा सबैभन्दा धेरै मत कुल ७४.११ प्रतिशन वडा नं. १३ मा खस्यो भने सबैभन्दा कम वडा नं. १० मा ६२.६७ प्रतिशत मत खस्यो। ७० प्रतिशतभन्दा कम मत खस्ने वडाको संख्या १४ रहेको छ भने ७० भन्दा बढी प्रतिशत मत १५ वटा वडामा खसेको छ।

सबै वडाको मतपत्र आएसँगै सर्वदलीय बैठक बस्नेछ र त्यसले नै मतगणनाको समय निर्धारण गर्नेछ ।