असार १६ । क्यानडामा अत्यधिक गर्मीका कारण गत शुक्रबार यता १३० भन्दा बढी व्यक्तिको मृत्यु भएको छ। पछिल्लो दुई दिनमा मात्रै ६० जनाले ज्यान गुमाएका छन्। ज्यान गुमाउनेमा ज्येष्ठ नागरिकहरू धेरै छन्।
क्यानडाको दक्षिणी प्यासिफिक नर्थवेष्ट क्षेत्रमा तापक्रम अत्यधिक बढेको हो। गत मंगलबारमात्रै क्यानडाको लिटनमा हालसम्मकै सबैभन्दा बढी तापक्रम मापन गरिएको छ। मंगलबार सो क्षेत्रको तापक्रम ४९.५ डिग्रिसेल्सियस मापन गरिएको छ। आइतबार ४६.६ डिग्रिसेल्सियस थियो भने सोमबार बढेर ४७.९ डिग्रिसेल्सियस पुगेको थियो।
भ्यान्कुभरको प्रहरी अधिकारीहरूले गर्मीका कारण एक्कासी मानिसको मृत्यु भइरहेको बताएका छन्। भ्यान्कुभरमा मात्र गर्मीका कारण ६५ जनाको ज्यान गएको छ।
क्यानडाले बढ्दो तापक्रमबारे ब्रिटिश कोलम्बिया र अल्बेर्टालाई चेतावनीसहितको सूचना जारी गरेको छ। त्यसबाहेकका उत्तरपश्चिमी भूभागलाई पनि सूचना जारी गरिएको छ। गर्मीका कारण पछिल्ला केही दिन यता क्यानडाको समग्र जनजीवन नराम्रोसँग प्रभावित भएको अन्तर्राष्ट्रिय सञ्चारमाध्यमहरूले उल्लेख गरेका छन्। एजेन्सी
