काठमाडौं, फागुन २० । हिमालय एअरलाइन्सले नयाँ विमान थप गरेको छ। नेपालको निजी अन्तर्राष्ट्रिय उडान भर्ने एक मात्र एअरलाइन्स् कम्पनीले पाचौं वार्षिकउत्सवको अवसरमा ए ३१९-११५ विमान थप गरे पछि विमान संख्या ४ पुगेको छ।
कम्पनीका उपाध्यक्ष क्यापटेन हाओ दीले चीनको तियानजिन बिन्हाई अन्तर्राष्ट्रिय विमानस्थलबाट नयाँ विमान एमएसएन ९०२०, दर्ता नम्बर ९ एन–एजेके त्रिभुवन अन्तर्राष्ट्रिय विमानस्थलमा जहाज भित्र्याएको छ। सन् २०१४ बाट शुरु भएको हिमालय एअरलाइन्स्ले यस अघि ३ एअरबस ए३२०-२१४ र थप गरिएका नयाँ एअरबस ए३१९-११५ गरी चारवटा विमानबाट सेवा दिने भएको हो।
नयाँ एअरबस ए३१९-११५ छोटो देखि मध्यम दूरीको उडान भर्ने एअरबस ए-३२० परिवारकै विमान हो। एअरबस कम्पनीद्वारा निर्मित यो विमान न्यारो-बडी, दुई इन्जीनयुक्त जेट विमान भएको कम्पनीले जनाएको छ। आठ बिजनेस क्लास सिट र १ सय २० इकोनोमी क्लास सिट क्षमता छ। विमानमा नयाँ र कुशल इन्जीन क्षमता रहेको छ जुन १५ प्रतिशतसम्म इन्धन बचत गर्न सक्षम हुने कम्पनीको भनाई छ।
कम्पनीले स्थापनाको ४ वर्षमै ६ देशका दोहा, दमाम, ढाका, क्वालालम्पुर, आबुधाबी र चीनको चाङसा, गुईयाङ, सेनजेन, बेइजिङ र चोङकिङ गरी १० गन्तव्यस्थलमा सेवा शुरु गरी सकेको छ।
