डाक्टर भन्छन्, ‘वेड खाली हुन कि त बिरामीको मृत्यु हुनुपर्‍यो, कि त ठीक हुनुपर्‍यो’

चितवन २९ वैशाख । जटिल खालका कोरोना संक्रमित बढ्दै गएपछि भरतपुर भरतपुरले थप शय्याको व्यवस्था गरी १४५ बाट २०० पुर्‍याउने तयारी गरेको छ। अस्पताल विकास समितिका अध्यक्ष डा भोजराज अधिकारीका अनुसार कोभिडको पहिलो लहरपछि करिबकरिब खाली भइसकेपछि पुनः पहिलेकै सेवामा फर्कन थालेको भरतपुर अस्पतालमा आइसियूसहित शय्या बढाउनुपर्न बाध्यता छ। चितवन बाहिरबाट पनि दैनिक एकसय जनाको फोन आइसियूसहितको शय्या खाली छ कि छैन? भनेर आउने गरेकोले अस्पतालले क्षमता बढाउन बाध्य भएको उनले बताए। ‘दिनमा १०० फोन त बेड आइसियू खाली छ भनेर मात्रै आउने गरेका छन्,’ उनले भने, विशेष गरेर बाँके, दाङ, सल्यान, प्युठान, रुपन्देही, मकवानपुर र पर्सा लगायतका २२ जिल्लाबाट फोन आइरहेका छन्। जबकी शतप्रतिशत शय्या भरिएका छन् र खाली हुन कि त बिरामीको मृत्यु हुनुपर्‍यो, कि त बिरामी ठीक हुनुपर्‍यो।’