काठमाडौं, बैशाख ६ । सभामुख अग्निप्रसाद सापकोटाले संसद अधिवेशनबारे आफूसँग कुनै परामर्श नगरिएको बताएका छन्। सोमबार बसेको मन्त्रिपरिषद् बैठकको सिफारिसमा राष्ट्रपति विद्यादेवी भण्डारीले अधिवेशन अन्त्यको घोषणा गरेपछि प्रतिक्रिया दिँदै सापकोटाले आफूसँग यस विषयमा कुनै परामर्श नगरिएको स्पष्ट पारेका हुन्।
सोमबार सिंहदरबारस्थित आफ्नै कार्यकक्षमा सञ्चारकर्मीहरूसँग कुराकानी गर्दै सभामुख सापकोटाले संसद अधिवेशन अन्त्य गर्ने विषयमा प्रधानमन्त्री केपी शर्मा ओलीले आफूसँग छलफल नै नगरेको बताए।
‘अधिवेशन अन्त्य गर्नेबारे मसँग कुनै परामर्श भएको थिएन’, उनले भने।
सामान्यतया संसद अधिवेशन शुरू र अन्त्य गर्दा सरकारले सभामुखसँग परामर्श गर्ने प्रचलन छ। तर, प्रधानमन्त्री ओलीले संसदको बैठक बस्नु एक दिनअगावै अधिवेशन अन्त्य गराएका हुन् । संसद् बैठक मंगलबार बस्ने तय गरिएको थियो।
प्रधानमन्त्री ओली सभामुख सापकोटासँग असन्तुष्ट छन्। शनिबार बसेको सर्वदलीय बैठकमा समेत प्रधानमन्त्री ओलीले सभामुखप्रति निकै असन्तुष्टि पोखेका थिए। ओलीले सभामुखकै कारण अमेरिकी सहयोग कार्यक्रम (एमसीसी) संसदबाट अनुमोदन हुन नसकेको आरोप लगाएका थिए।
