कतिपय अवस्थामा थाहै नभइ हाम्रो शरीरमा विभिन्न प्रकारका रोगले आक्रमण गर्दछ। यस्तै रोगमध्ये एक हो बाथ। शरीरमा हुने रोग प्रतिरोधात्मक पद्धतिको असन्तुलनले बाथ रोग लाग्ने गर्दछ। शरीरमा रोगसँग लड्ने रोग प्रतिरोधात्मक क्षमतामा गडबडी आएपछि बाथ रोग उत्पन्न हुन्छ। यसले शरीरका विभिन्न जोर्नीहरुमा असर पुर्याउँछ। सामान्यतया बाथरोगमा जोर्नी दुख्ने लक्षण नै मुख्य हो।
जोर्नीबाहेक शरीरका अन्य भागहरु फोक्सोमा लागे दम आउने, अक्सिजन घट्दै जाने, हातखुट्टाहरु निलो हुँदै जाने, खकार लाग्ने, खकारमा रगत देखिने हुन्छ। किड्नीमा लागे पिसाबबाट रगत जाने, पिसाबबाट प्रोटिनहरु जाने, त्यसले गर्दा जिउहरु दुख्ने त्यस्तो समस्याहरु देखिन सक्छ।
त्यस्तै मस्तिष्कमा बाथरोग लागे मिर्गी रोग लाग्ने वा बेहोस हुने समस्याहरु देखिन सक्छ । कुन अङ्गमा बाथरोग लाग्छ, त्यस अनुसार फरक फरक लक्षण हुन सक्छ।
बाथरोगले कपालदेखि नङ्सम्म असर गर्दछ। बाथ रोगले मान्छेको ज्यान लिने संभावना कम हुन्छ। तर अपाङ्गसम्म बनाउन सक्छ। बाथ रोग सक्रिय भए उपचार गर्नुपर्दछ अन्यथा उपचार गर्नु पर्दैन। तथापी बाथका बिषयमा चिकित्सकको परामर्श अनिवार्य हुन्छ।
























