अमेरिका, बैशाख ४ । अमेरिकाको भर्जिनियामा अर्थशास्त्री प्रा डा विष्णु पौडेलको ८९ वर्षको उमेरमा निधन भएको छ।
बुधबार उनको निधन भएको हो। दुई छोरी र एक छोराका पिता पौडेल श्रीमति डाक्टर प्रमिला पौडेलका साथमा भर्जिनियामा बस्दै आएका थिए।
घरमै बसिरहेको अवस्थामा अचेत भएपछि तत्काल फेयरफ्याक्स अस्पताल पुर्याउँदा त्यहाँ उनलाई मृत घोषणा गरिएको थियो। झण्डै ५० बर्ष भन्दा अगाडि अमेरिका पुगेका पौडेल अमेरिकाका डेमोक्रेटिक उच्च पदस्थ राजनीतिज्ञहरुमाझ समेत प्रभावशाली थिए।
उनले नेपालका लागि अमेरिकी राजदूत बनाउनका लागि डेमोक्रेटिक पार्टीका नेताहरुले तीन पटकसम्म सिफारिस गरेका थिए।
नेपाली, हिन्दी, अँग्रेजी र संस्कृत भाषामा समेत उच्च दख्खल राख्ने पौडेलले भारतको जवाहरलाल नेहरु विश्वविद्यालयबाट अन्तर्राष्ट्रिय सम्बन्धमा पीएचडी गरेका थिए।
उनको निधनले अमेरिकाको नेपाली डायस्पोरामा अपुरणीय क्षति पुगेको सामाजिक व्यक्तित्व इक्वालिटी फाउण्डेशनका सीईओ तथा एएनएका वर्तमान अध्यक्ष मेदिनी अधिकारीले बताए।























